Page 77 - Tarih Çevresi Dergisi

tarih çevresi

EK – 3: H. 1274 / M. 1858 Tarihli Ceza Kanunname-i Hümayununda sahtekârlık ile ilgili yer alan maddeler [Kaynak:
Cüzdân-ı Kavânîn-i Osmaniyye, Mürettibi: Müntesibîn-i Hukukdan Adanalı Kasparyan Arasdakis, Asadoryan Matbaası,
İstanbul 1312, s. 969-973]

ONBEŞİNCİ FASIL

SAHTEKÂRLIK BEYANINDADIR

148. Mâdde: Evâmir-i Devlet-i ‘Aliyyeyi taklîd eden ve ettiren ve me’mûrîn-i devletin sahh ve imzâsını taklîd
eden ve ettiren ve Devlet-i ‘Aliyye me’mûriyetlerine ve me’mûrlarına mahsûs bir mühre taklîden sahte mühür i‘mâl eden
ve böyle sahte mührü isti‘mâl eyleyen ve bi’l-cümle hazâ’in ve mâl sandıklarının mutedâvil olan eshâm ve tahvîlât ve
sirki ve sâire her gûnâ senedâtını taklîd veya sahtekârlıkla tağyîr eden ve böyle sahte kavâ’im ve senetler isti‘mâl veyâhûd
memâlik-i mahrûseye idhâl eyleyen kimseler on seneden aşağı olmamak üzere muvakkaten küreğe ya kalebentlik cezâsı
ile mücâzât olunur.

149. Mâdde: Her kim mîrîye müte‘allik olan her nev‘i tuğralı damgalardan birini taklîd veya sahtekârlık sûretiyle
tağyîr eder ise on seneyi tecâvüz etmemek üzere muvakkaten kürek ya kalebentlik cezâsı ile mücâzât kılınur ve böyle
tuğralı mîrî damgalarından birini bir takrîb ele geçirüb de ânı devlet ve memlekete muzırr olacak sûretde isti‘mâl eden
kimse üç sene habs olunur.

150. Mâdde: Her nev‘i emti‘a ve eşyâ üzerine Devlet-i ‘Aliyye nâmına olarak basılmağa mahsûs olan ve gerek
bir me’mûriyete ve gerek devletin ruhsatıyla olan bir şirkete veyâhûd bir ticâret evine mahsûs bulunan her nev‘i mühür
ve damga ve nişânlara taklîd veyâhûd o makûle sahte damga ve nişânları isti‘mâl eyleyen kimse üç sene habs ile mücâzât
olunur ve bu sahtekârlığından dolayı vâki‘ olan zarar kendisine tazmîn ettirilir. Her kim bu misillü mühür ve damga ve
nişânların asıllarını bir takrîb ele geçirib de gerek hükümet ve me’mûriyetlerin ve gerek bir cem‘iyet-i ticâretin ve bunların
emsâli hey’et ve şirket-i mahsûsanın menfa‘atine muzırr olacak halde isti‘mâl eyler ise altı aydan bir seneye kadar habs
ile te’dîb kılınur ve bu sûretle vâki‘ olan zarar dahi ol kimseye tazmîn ettirilir.

151. Mâdde: Mevâdd-ı sâbıkada beyân olunan sahtekârlık ile müttehem olan kimselerden her kim ol cinâyetlerin
tamâm-ı icrâsından evvel veyâhûd daha hükümet tarafından emr-i taharrîyâta şurû‘ olunmazdan mukaddem keyfiyeti ve
mütecâsir olanları cânib-i hükümete ihbâr eder ve emr-i taharriyata şurû‘ olunduktan sonra dahi sâir müttehemlerin ahz u
girift olunmalarına hizmet eyler ise mücâzâttan mu‘âf olub fakat muvakkaten Zaptiye Nezâreti altında tutulur.

152. Mâdde: Me’mûrînden her kim olur ise olsun hîn-i icrâ-yı me’mûriyetinde mukaddem yapılmış olan i‘lâm
ve mazbata ve sâ’ir senedâtın veya defter ve cerîde ve sâ’ir sicillâtın gerek sutûru arasına ilâve ve gerek hatt ve hâtem
veya imzâyı tağyîr ile veya bir şahsın ismi yerine diğer bir şahsın ismini koymak ile sahtekârlık eder ise on seneden aşağı
olmamak üzere muvakkaten kürek yahut kalbentlik cezâsı ile mücâzât olunur ve eğer bu sahtekârlığı eden kimse me’mû-
rînden değil ise yedi seneyi tecâvüz itmemek üzere muvakkat kürek veyâhûd kalebentlik cezâsı ile mücâzât olunur.

153. Mâdde: Bir me’mûr, mecâlis ve mehâkimde ve sâ’ir umûr-ı ‘ibâd rü’yet olunan mahallerde erbâb-ı mesâlih
için yapılan her nev‘i senedât ve evrâk-ı resmiyeyi me’mûriyeti iktizâsınca tanzîm eder iken gerek sâhibi maslahat olanların
takrîr ve ifâdelerini başka türlü yazarak ve gerek keyfiyet-i gayr-i sahîhayı sahîh yerine veyâhûd i‘tirâf olunmayan bir hâl
ve keyfiyeti i‘tirâf olunmuş hükmüne koyarak hilekârlıkla asıl maddeyi veyâhûd ahvâl-i müteferri‘asını tağyîr ile sahte-
kârlık eyler ise on seneden aşağı olmamak üzere muvakkaten yâhût kalebentlik cezâsı ile mücâzât olunur.

154. Mâdde: Maddeteyn-i sâbıkateynde beyan olunan sahte evrâkı bilerek isti‘mâl edenler yedi seneyi tecâvüz
etmemek üzere muvakkaten prangabent ya kalebent kılınur.

155. Mâdde: Bir şahsa müte‘allik olan evrâk-ı mahsûsada bâlâda beyân olunan sûretle sahtekârlık eden ve bu ma-
kûle sahte evrâkı bilerek isti‘mâl eyleyen kimseler bir seneden üç seneye kadar habs ile mücâzât olunur.

156. Mâdde: Yol emri ve mürûr tezkeresi ve pasaportlara sahte isim yazdıran veyâhûd bu makûle hîle ile yol ka-
ğıtlarını istihsâl için kefâlet eyleyen şahıs altı aydan iki seneye kadar habs olunur.

157. Mâdde: Yol emri ve mürûr tezkeresi ve pasaportu sahte olarak yapan ve yahut sahîh olan böyle bir yol kağıdını
tağyîr ve tahrîr eden ve bu makûle sahte ve tağyîr olunmuş evrâkı isti‘mâl eyleyen eşhâs bir seneden üç seneye kadar

75